紋上癮

我估有心人只要睇個標題就知我想講什麼，但在未入正題前，先同大家分享一個勁傻瓜的小故事。本人一向也很喜歡聽收音機，因為習慣了一邊做嘢一邊要聽下歌仔來幫我更集中，有人未必同意， 但如果你試過在集中到極點時會什麼都聽唔到，好像進入了另一個空間的經驗可能會明白我意思，而聽住收音機或歌仔就有助我進入這個空間，但不在此詳談這個，因越講會越遠。其實只係想話我是在聽收音機時聽到一個節目在訪問 Phat Chan (紋上癮作者) 時得知有這本書的，而我記得大約是上年聽到相關訪問，記憶中有提及過是會在書展中推出，但因為書展越來越唔似書展，又太多人了，記得最後一次去書展時花了差 不多三小時排隊才入到場，所以怕了再去書展了，雖然每年我也是極之想去的，回想之前入去掃書，真的很有快感。又講遠了，總之想講的傻瓜事是我以為此書是今年書展推出，但原來上年就已經出了，但這書我估賣得不錯，因我近日都要走幾間書店先賣到，仲要係得一本。我買書時個職員講咗句 : lee 本書成日無貨嫁，你 lee 本都係由其他店拿過來賣。絕對值得開心，因香港還有很多人喜歡另類藝術。

遊完花園可以入正題了。但講到現在，大家都估到我是想分享一下《紋上癮》一書吧。我用了兩晚時間把書看完，不是我睇得快，只係幾個小時就可以睇完(如果只係讀字)，內裡圖同字可以話係 50/50，所以我大部份時間都是花在欣賞圖片的。先講字的部份，頭果三分二內容有D悶，而且使我有失望的感覺，因提到的內容種類雖然多，但全部蜻蜓點水，只係提及下就算，由其係書中主打訪問明星紋身背後故事的章節就更加係簡單到無論，連個明星身上D紋身的圖片也未可全部提供。但我指的並不是其中一位因一個很好的理由而不展示果位，而係其他幾位，所以在我睇到一半到時真的很失望，但最後總算把書睇完，而最後個部分講作者遊歷紋身展和最後訪問的陳惠敏和紋身師Gabe叫做好少少，但都係好簡單的描述，不過我還是支持了這書，希望遲點推出的 DVD 會精彩一點吧。

最後來個總結。我個人覺得此書唔買會心癢癢，買了咪多咗本書，無乜特別，如果你無買書的習慣，可以留番D錢買DVD，因為睇個形勢，此書只係簡介，DVD 先係來真。講到尾，作者Phat Chan 是拍片，剪片出身，一定會比用書表達得好好多。
P.S. 這是遲了一年的閱讀報告，真的值得記住，另外如果有朋友知 DVD 幾時推出也請話我知呀，要不然，又唔知我要遲幾多先知道了…哈!!